Dhamma cakkappavattana sutta 전법륜경
[ Saɱyutta Nikāya 5-56-11]
Namo tassa bhagavato arahato sammāsambuddhassa.
Namo tassa bhagavato arahato sammāsambuddhassa.
Namo tassa bhagavato arahato sammāsambuddhassa.
1. Evam me sutaɱ:
Ekaɱ samayaɱ Bhagavā Bārāṇasiyaɱ viharati Isipatane Migadāye.
Tatra kho Bhagavā pañcavaggiye bhikkhū āmantesi:
2. "Dve me bhikkhave, antā pabbajitena na sevitabbā. [Katame dve?]
Yo cayāɱ kāmesu kāmasu khallikānuyogo hīno gammo puthujjaniko anariyo anatthasaɱhito,
yo cāyaɱ attakilamathānuyogo dukkho anariyo anatthasaɱhito.
Ete te bhikkhave, ubho ante anupakamma majjhimā paṭipadā Tathāgatena abhisambuddhā
cakkhukaraṇī ñāṇakaraṇī upasamāya abhiññāya sambodhāya nibbānāya saɱvattati.
3. Katamā ca sā bhikkhave, majjhimā paṭipadā Tathāgatena abhisambuddhā
cakkhukaraṇī ñāṇakaraṇī upasamāya abhiññāya sambodhāya nibbānāya saɱvattati?
Ayam eva ariyo aṭṭhaŋgiko maggo:
seyyathīdaɱ:
sammā-diṭṭhi,
sammā-saŋkappo,
sammā-vācā,
sammā-kammanto,
sammā-ājīvo,
sammā-vāyāmo,
sammā-sati,
sammā-samādhi.
Ayaɱ kho sā bhikkhave, majjhimā paṭipadā Tathāgatena abhisambuddhā
cakkhukaraṇī ñāṇakaraṇī upasamāya abhiññāya sambodhāya nibbānāya saɱvattati.
4. Idaɱ kho pana bhikkhave, dukkhaɱ ariyasaccaɱ:
Jāti pi dukkhā,
jarāpi dukkhā,
vyādhi pi dukkho,
maraṇam pi dukkhaɱ,
[sokaparidevadukkhadomanassupāyāsā pi dukkhā,]
appiyehi sampayogo dukkho,
piyehi vippayogo dukkho,
yam p'icchaɱ na labhati tampi dukkhaɱ,
saŋkhittena pañcupādā nakkhandhā dukkhā".
5. Idaɱ kho pana bhikkhave, dukkhasamudayaɱ ariyasaccaɱ:
"Yāyaɱ taṇhā ponobhavikā nandi rāgasahagatā tatra tatrābhinandinī,
seyyathīdaɱ:
Kāmataṇhā,
bhavataṇhā,
vibhavataṇhā".
6. Idaɱ kho pana bhikkhave, dukkhanirodhaɱ ariyasaccaɱ:
Yo tassā yeva taṇhāya asesavirāganirodho cāgo paṭinissaggo mutti anālayo.
7. Idaɱ kho pana bhikkhave, dukkhanirodhagāminī paṭipadā ariyasaccaɱ:
Ayam eva ariyo aṭṭhaŋgiko maggo,,
seyyathīdaɱ:
sammā-diṭṭhi,
sammā-saŋkappo,
sammā-vācā,
sammā-kammanto,
sammā-ājīvo,
sammā-vāyāmo,
sammā-sati,
sammā-samādhi.
8. Idaɱ dukkhaɱ ariyasaccan ti me bhikkhave pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
Taɱ kho pan'idaɱ dukkhaɱ ariyasaccaɱ pariññeyyan ti me bhikkhave, pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
Taɱ kho pan'idaɱ dukkhaɱ ariyasaccaɱ pariññātanti me bhikkhave, pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
9. Idaɱ dukkhasamudayaɱ ariyasaccan ti me bhikkhave pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
Taɱ kho panidaɱ dukkhasamudayaɱ ariyasaccaɱ pahātabbanti me bhikkhave, pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
Taɱ kho panidaɱ dukkhasamudayaɱ ariyasaccaɱ pahīnanti me bhikkhave, pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
10. Idaɱ dukkhanirodhaɱ ariyasaccanti me bhikkhave pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
Taɱ kho panidaɱ dukkhanirodhaɱ ariyasaccaɱ sacchikātabbanti me bhikkhave, pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
Taɱ kho panidaɱ dukkhanirodhaɱ ariyasaccaɱ sacchikatanti me bhikkhave, pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
11. Idaɱ dukkhanirodhagāminī paṭipadā ariyasaccanti me bhikkhave pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
Taɱ kho panidaɱ dukkhanirodhagāminī paṭipadā ariyasaccaɱ bhāvetabbanti me bhikkhave, pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
Taɱ kho panidaɱ dukkhanirodhagāminī paṭipadā ariyasaccaɱ bhāvitanti me bhikkhave, pubbe ananussutesu dhammesu
cakkhuɱ udapādi ñāṇaɱ udapādi paññā udapādi vijjā udapādi āloko udapādi.
12. Yāva kīvañca me bhikkhave, imesu catusu ariyasaccesu
evaɱ tiparivaṭṭaɱ dvādasākāraɱ yathābhūtaɱ ñāṇadassanaɱ na suvisuddhaɱ ahosi,
n'eva tāvāhaɱ bhikkhave, sadevake loke samārake sabrahmake sassamaṇabrāhmaṇiyā pajāya sadeva-manussāya anuttaraɱ sammāsambodhiɱ abhisambuddho paccaññāsiɱ.
13. Yato ca kho me bhikkhave, imesu catusu ariyasaccesu
evaɱ tiparivaṭṭaɱ dvādasākāraɱ yathābhūtaɱ ñāṇadassanaɱ suvisuddhaɱ ahosi,
athāhaɱ bhikkhave, sadevake loke samārake sabrahmake sassamaṇa brāhmaṇiyā pajāya sadeva manussāya anuttaraɱ sammāsambodhiɱ abhisambuddho (ti) paccaññāsiɱ,
14. ñāṇañca pana me dassanaɱ udapādi
Akuppā me ceto-vimutti, ayam antimā jāti natthidāni punabbhavo ti.
15. Idam avoca Bhagavā attamanā pañcavaggiyā bhikkhū Bhagavato bhāsitaɱ abhinanduɱ ti,
imasmiñ ca pana veyyākara-ṇasmiɱ bhaññamāne āyasmato Koṇḍaññassa virajaɱ vītamalaɱ dhammacakkhuɱ udapādi:
Yaɱ kiñci samudayadhammaɱ sabbantaɱ nirodhadhamman ti.
16. Pavattite ca pana Bhagavatā dhammacakke
Bhummā devā saddam anussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
17. Bhummānaɱ devānaɱ saddaɱ sutvā
cātummahārājikā devā saddamanussāvesuɱ:
"etaɱ Bhagavatā bārānasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Cātummahārājikānaɱ devānaɱ saddaɱ sutvā
Tāvatiɱsā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Tāvatiɱsānaɱ devānaɱ saddaɱ sutvā
yāmā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Yāmānaɱ devānaɱ saddaɱ sutvā
tusitā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Tusitānaɱ devānaɱ saddaɱ sutvā
nimmāṇaratī devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Nimmāṇaratīnaɱ devānaɱ saddaɱ sutvā
paranimmitavasavattī(no) devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Paranimmitavasavattīnaɱ devānaɱ saddaɱ sutvā
brahmapārisajjā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Brahmapārisajjānaɱ devānaɱ saddaɱ sutvā
brahmapurohitā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Brahmapurohitānaɱ devānaɱ saddaɱ sutvā
mahābrahmā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Mahābrahmānaɱ devānaɱ saddaɱ sutvā
parittābhā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Parittābhānaɱ devānaɱ saddaɱ sutvā
appamāṇābhā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Appamāṇābhānaɱ devānaɱ saddaɱ sutvā
ābhassarā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Ābhassarānaɱ devānaɱ saddaɱ sutvā
parittasubhā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Parittasubhānaɱ devānaɱ saddaɱ sutvā
appamaṇasubhā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Appamaṇasubhānaɱ devānaɱ saddaɱ sutvā
subhakiṇhakā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Subhakiṇhakānaɱ devānaɱ saddaɱ sutvā
vehapphalā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Vehapphalānaɱ devānaɱ saddaɱ sutvā
avihā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Avihānaɱ devānaɱ saddaɱ sutvā
atappā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Atappānaɱ devānaɱ saddaɱ sutvā
sudassā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Sudassānaɱ devānaɱ saddaɱ sutvā
sudassī devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
Sudassīnaɱ devānaɱ saddaɱ sutvā
akaniṭṭhakā devā saddamanussāvesuɱ:
"etaɱ Bhagavatā Bārāṇasiyaɱ Isipatane Migadāye anuttaraɱ dhammacakkaɱ pavattitaɱ appativattiyaɱ samaṇena vā brāhmaṇena vā devena vā mārena vā brahmunā vā kenaci vā lokasminti".
18. Iti ha tena khaṇena tena muhuttena
yāva Brahmalokā saddo abbhuggañchi.
Ayañ ca dasasahassī loka-dhātu saŋkampi sampakampi sampavedhi.
Appamāṇo ca uḷāro obhāso loke pāturahosi
atikkamma devānaɱ devānubhāvaɱ.
19. Atha kho Bhagavā udānaɱ udānesi:
Aññāsi vata bho Koṇḍañño, aññāsi vata bho Koṇḍañño ti.
Iti hidaɱ āyasmato Koṇḍaññassa Aññā-Koṇḍañño tveva nāmaɱ ahosī ti.
Sādhu sādhu sādhu
'수행. 정진 > 빨리어 삼장(Tipiṭaka)' 카테고리의 다른 글
| 망갈라 숫따(길상경) Mahā Maṅgala Sutta (0) | 2019.06.10 |
|---|---|
| 담마짝깝빠왓따나 숫따(전법륜경) Dhamma cakkappavattana sutta (0) | 2019.06.09 |
| Kuddhaka Nikāya 원문과 영역본 링크 (0) | 2019.06.03 |
| Aŋguttara Nikāya 원문과 영역본 링크 (0) | 2019.06.03 |
| Saɱyutta Nikāya 원문과 영역본 링크 (0) | 2019.06.03 |